ضجة ومنغصات شبه يومية
تم وسمي من قبل صديقنا علوش (شكراً)
لاكتب عن أكثر الاشياء والاصوات ازعاجاً بالنسبة لي وسأضيف عليها أصوات تعجبني … ووصاني ما اتنقل 😀
أكثر صوت بيزعجني هو صوت أظافر الآنسة “الطوال وخصوصي ازا كانت حاطة مناكير”على لوح المدرسة … وزيييق … مرة ووتنتين وقتا بيصل الدم لراسي هلاء صرنا جامعة وخلصنا منو بس اجانا شي تاني على أروع اللي هو صوت المايك لما بيكون الدكتور عميقربو من تمو وبدو يحكي وبيطلع هداك الصوت وما بيعود بيعرف يبعدويقربو شو يعمل بحالو وبيركدوا الفدائيين بدن يساعدوه ويزبطولوا ياه بعدين بالآخير بنستغنيي عنو وبنفتح آذانا للاصغاء للمحاضرة
الصوت التاني اللي بيضرب عالوتر هو صوت زمامير السيارات وقت العجئة ورا بعضهن …. بعدين بتجي شي سيارة مازوت أو غاز وبتبدا السمفونية مع بياع تماري كعك بصوت أجش … بتصير الوقفة للجنان وحدة بوحدة … وهات تطلع من هالعجئة …
بيزعجني صوت حنفية المي اللي عمتنقط !!!
بيزعجني صوت المفاتيح الكتيرة وخصوصي الشباب اللي بيعلقوا سبعمية مفتاج بجيبتن كأنن عندن أملاك وبيوت وعقارات وسيارات وهنن بيكونوا مفاتيح الخزانة بالبيت وبيكونوا ماشيين بالطريق … أكيد هتبنته عليهن لانو ما بتقدر ضيعن مع هالمفاتيح …
صوت شرب الشاي او القهوة بشكل واضح وشفط مميز مزعج جداً … وحتى صوت الطرطقة على الصحن بعد الانتهاء من الطعام !!!
صوت ال
NUDGE
تبع المسنجر … وخصوصي لما بتكون عمتسمع غنية .. او الجو هادي وعمتصمم او عمتكتب
الاستيقاظ عل صوت انسان عميدور على غرض حواليك ويكون عميخشخش بكياس موجودة أو يقيم غرض ويحط غرض (يكوكش)… يمكن بضل طول النهار مزعوجة من هيك فيئة
بيزعجني صوت طقطقة “فرقعة ” الأصابيع أو الرقبة !! يا لطيف بحس عظامي تكسرت
بيوجعلي راسي صوت الجهاز اللي مروحوتو تعبانة لدرجة بتحس انو تراكتور من العصر الحجري اللي شغال مو كمبيوتر من القرن العشرين
صوت حفارة الاسنان عند دكتور الأسنان بتضرب على كل أعصابي وما بحب اسمعا ولا بدي اسمعا لو عطوني مليون ليرة
صوت التلفزيون أول ما بينشعل “وشششش”او من زمان وقت نفقد القناة وتبدا تعمل هيك وبآخر الليل وقت نهاية الإرسال
الصوت الآكثر ازعاجاً بالنسبة إلي هو صوت فواصل قناة الجزيرة الأخبارية … مو انقاص من قيمة القناة ولا خطأ بالفواصل شي مؤكد…. بس بحسو مربوط بالكوارث أو الاشياء المزعجة اللي هتجي وراه ويحكوا عنا …
الاصوات اللي بتزعجني كتيرة يمكن لاني بحب الهدوء …
بدي قول انو بيعجبني صوت الاتصال بالانترنت وكأنو بالعالم الخارجي مع الكائنات الفضائية
😀 ما بعرف ازا الكل عندن منو ولا بس بسوريا
وكمان صوت أزرار الكيبورد وخصوصي ازا شخص سريع بالكتابة …
بيعجبني الصوت اللي بينادوا فيه الناس سواءاً بالمطار او المستشفيات …. وبعدين الطنة اللي بعدو مميزة وجميلة جداً …
بيعجبني صوت تقليب الورق … لكن بنعومة وهدوء ..
بيعجبني صوت المقص سواء على القماش أو الورق …
وصوت المكواة لما بتمر على شي مبلول … 😀
والحمد لله على نعمة السمع …
بالنسبة للاشياء المزعجة فهي مو كتيرة … يعني بالنسبة للاصوات
بيزعجني تصرف سائق التاكسي اللي ما بدو يكون يركب حدا او معو راكب … ووقت تأشرلو بيجي بيهدي بيهدي ظنك انو هيوقف وتركب ووقت توصل لعندو او يوصل لعندك او توصلوا لعند بعض
😀 بيرجع بيمشي بسرعة !!
ليه يهدي ازا ما بدو يوقف …
بيزعجني اني شوف بنت لابسة جزمة أو كندرة من اللون الفاقع خصوصي الأحمر !! وكأنها لمبة “نيونة”
بيزعجني تصرف الاشخاص اللي ما بيوجهوا الحديث غير لشخص واحد رغم وجود عدة اشخاص واقفين وبيتناقشوا بالفكرة … بس توجيه الفكرة لشخص واحد وكان البقية لا معنى لهم
بيزعجني تصرف الاشخاص اللي بيضفوني عالمسنجر من مجرد رسالة تمررت الهم وكان فيها ايميلي !
بيزعجني اتصرف لانسان اللي بالجامع وبيكون حامل حذاءه بحيث يأذي ويوسخ ملابس كل واحد بمر من جنبو … يضبن على بعض !
بتزعجني عجئة السوق وعجئة الأنفاق وخصوصي الآداب “بس عمأتعود ”
بيزعجني تصرف الناس لما بتقول “اانا مستعجلة ما بدي طول بالحديث” “بلا طول سيرة “وبعدين يمتد الحديث لاكثر من نصف ساعة ….
بتزعجني برادة الاشخاص اللي بيمشوا ادامي بالطريق لا بقدر اتجاوزهم ولا بقدر طالبهم بإسراع الخطى …
بيدايقني وبآلمني شوف شخص يرمي وسخ بالشارع دون أدنى شعور بالذنب ..
يزعجيني الاقرار الجماعي واللاجماعي من خلال الاكراه وجعل الناس يشعرون بالخجل من ابداء رايهم
اخر شي بيدايقني وبيزعجني حدا يمر بمدونتي وأعرف أنو قرأ سطوري وما يخبرني رايو بصراحة وشفافيه
واليوم كتبت بالعامي وكل الحق على فتوشة قرأت تدوينتها وبعدين كتبت تبعي فهيك طلعت … 😀
وشكراً علوش …
فرح
مارس 7th, 2008 at 9:00 ص
…” وبيركدوا الفدائيين بدن يساعدوه ويزبطولوا ياه بعدين بالآخير بنستغنيي عنو وبنفتح آذانا للاصغاء للمحاضرة”…
خيلة ذكرتيني بالفدائيين تبعونا، بس مو على الميك، على المسقط الضوئي، شنو الدكتور دائماً فاشل بالمعيارة بينو وبين الجهاز المحمول، وحتى أحياناً بيلغي فكرة الاستعانة فيو، بس الفضل للفدائيين، الله وكيلك فحطاحل، الله يخليننا ياهون.
مارس 7th, 2008 at 3:11 م
اتفقك معك في
((بدي قول انو بيعجبني صوت الاتصال بالانترنت وكأنو بالعالم الخارجي مع الكائنات الفضائية))
العامية بتاعتك جميلة بالتوفيق إن شاء الله
مارس 7th, 2008 at 4:03 م
من وين نكشتي كل هالشغلات 🙂
أكثر صوت بيزعجني هو صوت أظافر الآنسة “الطوال وخصوصي ازا كانت حاطة مناكير”على لوح المدرسة … وزيييق …
هالصوت بالذات ما بس بيزعج بيعمل قشعريرة .
هو صوت فواصل قناة الجزيرة الأخبارية …
و لما بكون بعد الفاصل جمال ريّن عم يهز براسو و صوت عنيف بقول الواحد يا ساتر !
مارس 8th, 2008 at 5:07 ص
علوش …
ههههههه امين الله يخليلنا ياهن ويضيعوا المحاضرة ، لكن بالفعل شي مزعج لما ما بيكون كلشي مجهز للدكتور والطلاب … يعني لشو كل هالموظفين …
المهم شكراً علوش على وجودك …
ღ ღ
أبو مروان …
شكراً لك أسعدني مرورك جداً .. دمت بخير
ღ ღ
سلام …
بعد ما نزلت التدوينة ورجعت قريتها مرة تانية … حسيت حالي نئائة وكرارة لدرجة كبيرة هههههه
يعني حتى كل اللي تمرر الهن هالواجب ما كتبوا كتير هيك !!!
ما كنت مصدقة اني نئائة حتى اليوم 😀
لكن هي مجرد فشة قلب …
ايه والله يا ساتر .. شكراً لمرورك .. : )
ღ ღ
مهند …
يعني هي الحساسية الزيادة مفيدة أحياناً مو دائماً ببعض اوقات بس …
ومع ضجة الحياة والايقاع والرتم المزعج ما عاد في مكان لنكون حساسين زيادة ..
مشان هيك عماتعود انسى و ما دقق
شكراً لك صديقي ..
ღ ღ
أحمد بكداش ..
اهلا وسهلا فيك نورت … شكراً لك ..
ღ ღ
sheko
يمكن ما بيتركوا تعليق مشان ما يحملوا سيرفرات المدونة زيادة ههههه
شكراً شيكو على وجودك .. انبسطت فيه ..
ღ ღ
x-man
بالفعل الفكرة حلوة يرجع مصدرها لعلوش … اللي مررلي الواجب …
شكراً كتير عوني أخجلتني … الأهم هو صدى الكلمات مو بس صوتها …
ღ ღ شكراً لوجودكم جميعاً ودائماً شرفوني ღ ღ
مارس 8th, 2008 at 12:27 ص
صراحة فرح
اول مرة بقرالك هيك مدونة انا بس عجبتني كتير
وممكن من هيك مدونة اخد فكرة عن شخصيتك
كل يلي كتبتي بصير مع اي شخص بس انتي حساسة زيادة وهي ميزة حلوة بالشخصية
اغلب الأشياء يلي بتنزعجي منهن كمان بيزعجوني
شكرا فرح
بتمنالك التوفيق
مارس 8th, 2008 at 2:32 ص
بتزعجني برادة الاشخاص اللي بيمشوا ادامي بالطريق لا بقدر اتجاوزهم ولا بقدر طالبهم بإسراع الخطى …
كتير بتعصب..
تحياتي
مارس 8th, 2008 at 3:28 ص
يا الله , كل هيك يتعبك 😀
انا اكثر شىء يتعبنى ويتعبك هوا زحمة المواصلات و الصوت الناتج عن شرب الشاى او القهوة وايضا ان يقوم احد بزيارة المدونة ولا يترك تعليق ليش لا اعرف بالرغم انه يعاود الزيارة اى اعجبته لماذا لا يترك تعليق لتقيمى لا اعرف !!!!!!!!!!!
بالتوفيق يا اخت فرح ان شاء الله والوضوع كتير حلو
الله يوفقك 😀
مارس 8th, 2008 at 4:01 ص
بيعجبني صوت كلماتك لما شوفك عم تكتبي من جديد
موضوع لزيز و فكرته جديدة و أهم شي فيه إنه عفوي
بالتوفيق إن شاء الله
مارس 8th, 2008 at 7:00 ص
“بدي قول انو بيعجبني صوت الاتصال بالانترنت وكأنو بالعالم الخارجي مع الكائنات الفضائي”
ممم, صوت المودم , ايه لاحظت انه بالشام اله صوت شوي ومختلف 🙂 ,
مممم مدونة جميلة 🙂 ,
حلو لما شوف الكل مستمتع الواجب يلي عملتو 🙂 , يلا لشوف لوين بدو يوصل هلمرة … و جهزت واجب تاني . 😀
تحياتي لك و نهارك سعيد
مارس 8th, 2008 at 12:00 م
بيزعجني تصرف الاشخاص اللي ما بيوجهوا الحديث غير لشخص واحد رغم وجود عدة اشخاص واقفين وبيتناقشوا بالفكرة … بس توجيه الفكرة لشخص واحد وكان البقية لا معنى لهم .
عندما أجد أمثال هؤلاء فإنني لا أعيرهم إهتماماً بالمثل كي ينتبهوا في المره القادمه .
مدونتك جميلة للغاية 🙂 .
مارس 8th, 2008 at 5:17 م
“بيزعجني صوت حنفية المي اللي عمتنقط” اي طولي بالك مو لهالدرجة .. على سيرة المي مدري كيف تذكرت صوت قباب الحمام .. تخيلي الناس عم تمشي بالشارع وهي لابسة قبقيب .. مو صوتهن أحلى من أصوات عجقة السيارت
بشاركك بموضوع الفيقة بكير على صوت مزعج بالفعل بأضي نهاري كلو وأنا مضايق ومزعوج
حلوة هالتدوينة فرح
مارس 10th, 2008 at 3:47 ص
Qabbani …
يا ميت اهلين وسهلين …. اسعدني وجودك …. فعلاً واجب حلو كتير … كترلنا منن 😀
ღ ღ
أراك لاحقاً….
مرة عملت هيك بأحدى الأشخاص على أمل ان ينتبه في المرة القادمة …. ولكن للأسف لم يعد هناك مرة قادمة حيث قرر ان لا يعاود الكلام معي مرة أخرى !!! :S
شكراً لتوجداك… انبسطت فيه
ღ ღ
مستر بلوند…
هو صوت كعوبة البنات يعني أنظم … كلو بهون ادام عجئة السيارات : (
لازم نكتب لافتة ممنوع اصدار الاصوات او الانفاس او الكوكشة حتى ساعة الاستيقاظ 😀
الحلو وجودك …شكراً لك ..
ღ ღ
مارس 10th, 2008 at 11:25 ص
مررت من هنا فقط ..
وأحببت تسجيل حضوري ..
أعجبتني المدونة وأسلوب كتابتك 🙂
مارس 10th, 2008 at 7:23 م
عزيزتي ،،
أنتي دائماً مبدعة قلمك البهي ..
في انتظار جديد بشغف،،
أختك في الله ..
مارس 10th, 2008 at 8:59 م
موضوع أكثر من رائع
يسلمو إيديكي بالفعل أصوات غير محببة بس بتصدقي هلق لإنتبهت
أوقات كمان الهدوء بيكون مزعج والهدوء اللي مابحبو لما تقطع الكهربا بنص الليل بالبلد اللي أنا فيها وهون الناس بتنام بكير بطلع لبرا بحس الدنيا كبيييييييييرة وأنا ضايع فيها لحالي ( بس منظر النجوم كتير حلو )
موفقة فرح وبإنتظار المزيد
مارس 13th, 2008 at 1:35 م
ياااه من أجمل المدونات اللي قريتها
اشترك معاج في حب الصوت اللي بينادون فيه الناس في المطارات و الطنه اللي بعدها
😀 أعشقها .. و يتجدد حبي لها كل ما اشتقت للسفر
كلمات حلوه فروحه
استمتعت بقرائتها
,,
مارس 20th, 2008 at 1:17 ص
أنا لا أنا بلاش
شو هالإشاعات المغرضة .. عامي ما عامي
ليش نحنا طلاب الصحافة السوريين بيطلعنا معنا غير حكي محنط 🙂
مدري ليش لما جبتي سيرة الدكاترة والميكرفون بلشوا يطنطنوا أداني .. تذكرت دكاترتنا الكرام !
ابقي سلميلي عليهن
مارس 29th, 2008 at 5:58 ص
ثامر ..
يا هميت أهلين وسهلين .. شكراً لوجودك الكريم ..
ღ ღ
حائرة …
يخليلي ياك … من زوءك ..
ღ ღ
عبود
ايه الحق معك .. بتحس بالاشباح : p
يعني هدا صوت الصمت .. .. بس مناح النجوم بنسوك
شكراً لوجودك
ღ ღ
عذاري …
انت الحلوة … ايه شو عمنشتاق للسفر .. ما في احلى منو ..
نورتي المدونة عذوره .. دائماً زوريني …
ღ ღ
فتوشة ..
وانا بقول ليه هيك حليانة المدونة تاري انت علقت ..
ههههههه ايه تكرم عيونك هسلملك عليهن فرداً فردً ومسدساً كمان …
ღ ღ ღ ღ
أبريل 3rd, 2008 at 12:04 ص
أه كان بدي قلك خصوصاً خصوصاً عطا الله
بس المشكلة أنو طار يا حرام 🙂
أبريل 3rd, 2008 at 12:10 ص
لك لك الله يسسسسسسسسسسسامحك …
ما يسمعك بسسس
ليكو اليوم اليوم الصبح كان عميحوص قدامي بالمحاضرة ويضحك كمان … بضحكته المتميزة جداً جداً
ما طار بس يا ريتو … طـار