من راقب الناس مات .. هماً وغماً ونكداً وكداً وذماً!
لست من مشجعي الغش في الامتحانات، بل قد أكون أغبى الطلاب فيه، إلا أنني أكره طريقة المراقبين حدّ”العمى”
من شباك الضحك، من باب الترفيه، من قبو التنبيه… التحذي
ر ،من بوق التقدير.. أصنف:
مراقب “شكاك ويعشق الشوشرة”:
يشك بنفسه، يخاف لو أنه يحمل علامة على جواب ما، يظل يحوم حول الطلاب، يثبت عيونه كالصقر ويستمر بتدوير رأسه، وكلما تحرك أحدهم حركة صغيرة يقفز كالأسد لعنده ويتفحصه جيداً هذا إن لم يسأله لماذا استعملت الممحاة! ولماذا حركت رأسك؟ ولماذا ولماذا .. !وتبدأ الضجة والشوشرة في القاعة وإضاعة الوقت.
مراقب”معجب”:
يرفه عن نفسه بالإعجاب بالطالبات، ويسألهن ويطمأن عن حالتهن باستمرار، ربما يترك لهن الكتاب أو أي شيء مساعد، المهم راحتهن فقط، وأكثر من ذلك يطرأ على اسمهن، شكلهن.. شعرهن وتظل ابتسامته طوال فترة الامتحان وعيونه ترمش باستمرار ولهفة!!!
مراقب”راكض ورا الوقت والورقة”:
لا يسمح بدخول أحد حتى ولو بعد نصف دقيقة من توزيع الأسئلة! يبدأ الامتحان وعينه على الساعة، وكل ربع ساعة يصرخ في الطلاب منبهاً إياهم كم بقي من الوقت، وفي آخر خمس دقائق تتمنى لو يشق الجدار ليبتلعه ويتوقف عن عمل ديك الساعة !
قبل آخر دقيقة و59 ثانية ينقض على الطلاب ويسحب منهم الورقة بسرعة البرق وكأن تأخره لحظة، أو تركه للطالب يكتب كلمة أو سطر سيدخله الدرك الأسفل من النار!
مراقب”بردان،مرضان، نعسان”:
هادئ جداً، يلتصق بالمدفأة بأقصى مالديه من قوة، يغمض عينيه بهدوء ويستسلم لحلم جميل! نصيحة لا تقوم بقلب الورقة في حال كان واقفاً أمامك لانه سيستيقظ مزعوجاً منك فأغلبهم نومهم ملائكي!
مراقب مهتم يحبّ العلم وذكي:
يجلس بجانبك ويبدأ بقراءة الأجوبة، يمسك ورقة الأسئلة باهتمام شديد”حتى ولو كنت تحل منها” مع نظرة تمعن وإيماءة لسهولة الأسئلة وسخف الإجابات، وغباء الطلاب..
مراقب “خرمان على سيجارة”:
غالباً ما يكون غاضباً، ويريد أن يتفشش بأحدهم، ربما رأى الطلاب أمامه علب سجائر، لا تثير غضبه ولا تحمل القلم بطريقة توحي أنه سيجارة لانّ ذلك سيجيش انزعاجه (تخيلوا أن أحد المراقبين مرّة دخن في قاعة الامتحان..!)
مراقب”حزين وصفنان”:
الهموم لفوق رأسه، البيت والأولاد، الراتب وقلة الحال.. أما أنت افتح الكتاب، غش، تنقل، احكي “موفارقة”لانو بالنهاية رح تكون حالتك مثل حالته.
مراقب”متحطط على الطلاب و بحب لعبة الشطرنج “:
لا أعرف ماذا يأتي بباله ليقوم بنقل الطلاب من مكان لآخر، ومن مكان ثاني أيضاً، وأحياناً يستلم أحدهم ليغير مكانه ألف مرّة.. تسليه.. شوية حركة ورياضة!
مراقب “متعاون”:
وتعاونوا على البر والتقوى، يأخذ الجواب من طالب ويعطيه لآخر،حتى وإن كان خاطئاً! لا أعرف ماذا يستفيد!
مراقبات”بحبو الحكي”:
صبحية نسوان في قاعة امتحان.
مراقب”صاحب دين.. بشكل!”:
يستمر في التسبيح والاستغفار وتلاوة الأذكار فوق رأسك، على عيني ورأسي أنت واستغلال الوقت في الطاعة لكن ليس بصوت مزعج وفوق رأسي أثناء الامتحان .. الله سبحانه يسمعك إن استغفرت في قلبك : )
مراقب”ببساطة”:
يقوم بعمله دون زيادة أو نقصان بصدق وحب للطلاب.
طبعاً في “شوية” بهارات، لكن لا يخلو الأمر.. كل ما أتمناه أن يحترموا الطالب ويتركوه بحالو …ولست أقول أن الطلاب ملائكة.. لكني في مكانهم هذه المرّة ولربما تُقلب الأدوار .. : )
يناير 11th, 2010 at 8:48 ص
حلوة كتير … ومن فرح أحلى …
يناير 11th, 2010 at 10:42 ص
:):):)
جميل جداً جداً التصنيف ….
عكلٍ ما بيزعجو هدول غير الدارس .. أما المودارس فعادي .. يمكن يكسب كم نقلة لجنب عمو الشاطر … 😀
بالتوفيق فرح ..
يناير 11th, 2010 at 11:22 ص
بما انو عنا موسم امتحانات
ماعرفت وين صنف حالي ضمن أي مراقبين؟
انا مراقبة متحاططة على الغشاشين للأبد ومارح اعطيهون فرصة يتنفسوا 🙂
فرح .. اجت بمخيلتي صبحية النسوان اللي كانت تصير قدامي بايام الامتحانات
بالتوفيق لكل اللي عندهم امتحانات
يناير 11th, 2010 at 1:42 م
أي شو هالروعة يا فرح
والله فشيتي كل قهري بهالمراقبين هههههه
توصيفك للمراقبين رووووووعة
مبدعة من يوم يومك يا أميرة التدوين
شكراً
يناير 11th, 2010 at 1:53 م
هههههههههه
1
يناير 11th, 2010 at 1:57 م
موضوع جميل
ترى بعض المراقبين وكأنه بينك وبينه ثأر قديم
نفسياً يتبعك ويخليك تنسى كل الي مذاكره
بيفكر نفسه محقق أمن دولة
بيدخل على مافيا ولا على سجن مجرمين
نازل سحب وشطب وختم وطرد وتوقيف ونهيق وصراخ
ونجد في النهاية بان الامتحات مدته نصف ساعة يتكون من سؤالين
يناير 11th, 2010 at 2:22 م
مراقب ببساطة !! للأسف ما مرق عليي هيك نموذج خلال مسيرتي الطويلة الى حد ما …
وفي نوع آخر من المراقبين لم تأتي على ذكره عزيزتي وهنن المستخدمين الي بينتظروا شهر الامتحان بفارغ الصبر حتى يترجموا كبتن بنوع من السطوة ويمارسوه على الطلاب …
جميل ما خطته يداك وأضحك الله مهجتك ..
إيماءة مرور
يناير 11th, 2010 at 4:40 م
حلوة حلوة ….. طريقة الكتابة حلوة ومعبرة وبأسلوب جيد جدا … لو سمحت حاج تطلعي على ورقة اللي جنبك …. بغير مكانك هه …. طلاب آخر زمن
سلامي لك
يناير 11th, 2010 at 5:11 م
والله يا فرح نسيتي المراقب يلي بيعجب مو بس بالبنات يلي عم تقدم لكن بالمراقبات التانيات وبيبلش يلطف جو معهن ويضحكهن وكلو على حساب راحتنا بالإمتحان
ههههه بس احلى شي بالموضوع انو نوم المراقبين ملائكي مستغرب كيف الشياطين بيقدرو يناموا متل الملايكة بلا تشبيه طبعاً 🙂
فرح والله بدي اشكرك لأنك فشيتيلي قلبي كتيييييييير وخليتيني شوي اطلع من جو الدراسة
دمتي بفرح يا فرح
يناير 11th, 2010 at 8:33 م
خليها بالقلب تسبح
ما بعرف بس يا ريت لو يتذكر المراقب انو هو كان بيوم من ذات الأيام طالب
أو انو عندو ولادو بكرا بدو يجي مين يراقبهن
على كل حال بغض النظر
التدوينة كتير حلوة
ومتل ما قالو من فرح أحلى وأطيب
يناير 11th, 2010 at 8:38 م
حلوة كتير فرح
عجبني التصنيف والتشابيه هههههه
تبع الشطرنج وتبع صبحية النسوان ههههه وكمان تبع صاحب الدين
اما تبع المعجب فما كانت تصير كوني شب
كان في مراقبات معجبات …. وهدول كانوا جيدات وقت اللي كون مو دارس المادة ومشطبها هههههههه
يناير 11th, 2010 at 10:39 م
مع المحاولات الجادة اثناء الامتحان من الجيران مشان النقل انا بفضل المراقبين المتشددين مشلن ماحدا يزعجني بالامتحان ويقطع سلسلة الافكار المجعلكة
يناير 12th, 2010 at 4:35 ص
في نوع المراقب النعنوج
بتقله وزع الأسئلة يا استاذ
بيصنف فيك
يا حبيب وزع الأسئلة
بحافظ على نظرته الغبية
يا حبيب قلبي عم يروح من وقتي حركلنا حالك ووزع الوراق
بتلاقيه بعد دقيقتين من حالة الشرود الذهني وبعد ما كل الطلاب بتبلش تتأفأف من تأخير توزيع الوراق .. بتلاقيه بئ الجوهرة وقال ” اذا ما في صمت بالقاعة الاسئلة ما بتتوزع ”
انه من وين بجبله الصمت انا ؟!
يناير 14th, 2010 at 7:56 م
حلوووووووووووووووووووووووووووووووة وملعووووووووووووووووبة فرووووووووووح كنا أنا وماهر رايحين عالامتحان وعم نحكي عن المراقبة الشغلة هي على ما يبدو ما إلا تصنيف عندك بس فظيعة ما شفت متلا ذاركة قوية تنكيت وبينطبق عليها كذا تصنيف فظييعة
بس بتعرف شو الحلو هو أنت وكتاباتك والبحر العذب الي انا اشتقتلو
شكرا لكلامك الرائع فررررررررررح
يناير 15th, 2010 at 12:46 ص
منتدى الأمين … كتيييييييييييييير حب التدوينة
يناير 19th, 2010 at 4:18 ص
هدى .. يوم اللي راقبت ِ طلعت ِ متلن كلن هدول .. وقال أختي ونبهناك على غلازتن !
—–
معاذ .. والخوفة كمان يسحبلولو الورقة 😀 😀 😀
——
ريم وانا أحييك 🙂 🙂 يا ستي صبحية النسوان ما بطيقها…فكيف لو كانت بالامتحان!!
——
غيييث 🙂 🙂 🙂 وينك وينك ما عم تبين يا صديق 🙂 وان شاء الله بتشوف فين يوم هههههه شكراً لوجودك انبسطت فيه ..
——
أبو مسلمة الغزي
الحق معك .. شي بيدايق … الله بعين
——-
حمزة .. صحيييييييح .. المستخدمين وآخ من المستخدمين بس بدن يتفششوا 🙂
شكراً لمرورك 🙂
——–
عطالله … بتأمر عمي .. اللي بدك ياه بصير .. P:
——-
نسمات الشام .. محمد 🙂
يييي والله ما بعرف شلون نسيتن .. وياكترن ويا كترن ..
بتذكر لما حولناها للمراقبة على اديش رقمك واديش رقمي .. الله يعينن علينا كمان ههههه
محمد كتير انبسطت بتعليقك والله يوفقنا وينجحنا يا رب 🙂
——-
جرعة زائدة … ماهر ..
شكراً لانو حطيتها بالمنتدى
وشايفتلك هالقلب من كتر شو عم تسبح فيه شغلات طف!! وما عاد يتحمل .. فضفض أخي فضفض 🙂
——–
بشار ..
شو مشان !! كمان في مراقبات .. اكيد هدول ولا مرة مروا فوق راسي .. ما بصيرلازم نعيدك كل المواد اللي صار فيها هيك ونحط عليك صطيف يراقبكP:
——-
أحمد ..
ايه والله الحق معك .. يعني الأفكار مجعلكة ويجي حدا يقطعها ما عاد زبطت منوب 🙂 🙂
شكراً لمرورك .. 🙂 🙂
——-
gabriel
صدقاً كنت آعدة عم ادرس وعايفة حالي .. فتت قريت تعليقك ضليت اضحك ساعة
لانو منظر كل واحد منن … بيفرط ضحك أكتر من التاني .. يالطيف!!!!
شكراً كتيييييييير على هالتعليق 🙂 🙂 🙂
——-
لمووووسة الشموسة .. اهليييين بعد زمان هالقمر ما بان 🙂 🙂
الحلو انك مريتي من هون وقريتها .. ابقي حاكينا 😉
يناير 24th, 2010 at 8:16 م
عجبني الصراحة مراقب معجب..(×
تصنيف جميل فرح…
يوليو 5th, 2010 at 7:54 م
تحياتي لكم
يناير 16th, 2011 at 7:37 م
في مراقب كان يشتغل حكم كرة قدم .. كل ربع ساعة بيصرخ وبيقول شباب باقي ساعة وربع .. ساعة .. 45 دقيقة .. وطبعاً بآخر ربع ساعة يصير بيعد الدقائق وحدة ورا وحدة .
وفي مراقب عندو شيزوفرينيا بيكون بأول شهر مراقِب وبالشهر البعدو مراقَب
🙂
يناير 16th, 2011 at 8:22 م
وصف ممتع جداً يلامس الواقع بكل تفاصيله الغريبة والطريفة.
يعني بدون شي الامتحانات كلها نكد وهم تعب قلب، ومو ناقصها منغصات لحتى يكملوها المراقبين!
التدوينة قرأتها سابقاً، بس حبيت علق وأتمنالك امتحانات موفقة 🙂