ذكرى بكالوريية

ذكرى حلوة من أيام البكالوريا والامتحان …. حبيت دونها

كان عنا امتحان انكليزي والطلاب كتير مرعوبين

المهم دخلنا للامتحان …وتفاجأت أني شفت آنستي تبع العربي وقت كنت تاني اعدادي بمدرستي القديمة

هتراقبنا هاد الامتحان

“طبعا نحنا ما ننمتحن بنفس مدرستنا وكل يوم بيراقبونا مراقبات جدد حتى الطالبات اللي بيكونوا معنا بالقاعة ما بنعرفهم ”

بدأ الامتحان وكانوا الأسئلة نوعاً ما صعبين …… هدا الشي خلى البنات يستعملواالخطة “ب” لا حدا يسألني شو الخطة “أ”

الخطة ب هي “الروشتية” والروشتية هي ورقة يكتب عليها الجزء الأصعب من المنهاج بخط صغير جدا ويتم تخبئتها حتى لا تراها المراقبة وتقوم الطالبة بالنقل منها لأخذ العلامة المستحقة للسؤال وتعتبر هذه الطريقة الأكثر خطورة لانو ازا شافتها المراقبة بتروح على البنت وبيحرموها من تقديم البكالوريا ثلاث سنوات

الحمد لله انا ما بعرف اتنقل ولا بعرف اكتب راشيتات وخطتي هي الدراسة

البنت اللي وراي كان معها روشيتة طلعتها وبدأت تنقل منها ……. واللي قدامي كان معها كمان وفي وحدة مقابلي كمنا كان معها وحدة

كلن مجهزين الخطة وبينفذوا

بس آنستي الحبوبة القوية لقطتهم وشافتهم وكمشتهم …… وهنن بينقلوا من الروشتية …… طبعا هي قلبها طيب وما هتروح من عمرهم تلات سنين

بس لما شافت هيك قالت انو بدها تفتشنا كلنا وما هتعمل شي بس تشوف الرشتيتات وتاخدهم

قربت لعندي طلعت فيني زورتني بطرف عينها وقالتلي “أنتي ما هيطلع منك شي “(انقاص من قيمتي ما بعرف اعمل روشيتة )

المهم عم القاعة جو من الهدوء المريب بعد ما أخدت الراشيتات ….بتتصوروا 4 مجهزين الخطة “ب”

ووحدة منهم كانت وراي …… وبدت بعصبية تنكشني على ظهري وبعنف وبشدة وانا كنت خايفة ووشي صار احمر واصفر واخضر وجميع ألوان الطيف يعني انا مالي مستعدة انحرم تلت سنين وانا دارسة وبنفس الوقت كنت محتاجة ركز كتير مشان اكتب صح….. وهي مستمرة بنكشي وتقريبا بضربي بعد شوي وانا هالافكار بدور براسي

انو ما بدي نقلها ما بدي اعمل هالشي وهلأ ازا شافتني المراقبة وازا لقطتني المديرة وازا خطأت بالسؤال وازا نقلت خطأ وازا ما لحقت الوقت وازا … وازا …. وازا

بالنهاية قررت اني لازم رد عليها لحسم هالموقف البايخ لانو والوقت بيمر وانا لازم كمل حل الاسئلة

استدرت نصف استدارة محاولة انو ما حدا يشوفني وقلتلها “شو بدك” بصوت واطي

فقالتلي


بدي محرمة(منديل)……… وهي عم تبكي

وقتها كان بدي اضحك بدي ابكي عليها ما بعرف شو بدي اعمل ولحسن الحظ كان معي محرمة وعطيتها ياه

لكن بالفعل موقف لا أحسد عليه

فرح

18 من التعليقات لـ “ذكرى بكالوريية”

  1. عونيNo Gravatar قال:

    ذكرى بكالوريية جميلة، لأقد أعدتي بنا إلى أيام الخوالي – أيام المدرسة و الإمتحانات و الروشتات و الطرد و المشاكل …………… أسلوبك جميل في الكتابة بس ليش اللهجة العامية؟ بفضل تكتبيها بالفصحى حتى الكل يفهموها.

  2. جميل أن أبتدئ نهاري بموقف طريف
    ابتسامة بحجم الدنيا … زارتني بسبب موقفك لجميل
    وذكرى جميلة

  3. جميل أن تكوني متمسكة برأيك

    تحياتي

  4. محمد max13No Gravatar قال:

    عدنا إلى ظنوا بالناس حسنا
    يعني أنا بجامعتي الله كان باليني بشلة لا بتعرف تنقل ولا بتعرف تسكت كلن بيصيروا ينكزوا ببعض ويا ريت واحد منن حافظ كلمة المهم احتياطيا كنت اجلس بعيد عنن ” بعود عن الشر وغنيلو “بس هاد ما كان يرحمني من صواتن المزعجة أما بكلوريتي بذكر منها مراقب عامل حكيم زمانو قلي ” الي بيشرب دبس بيعلق على شواربوا” ولليوم بحاول افهم شو كان قصدوا بيجوز الحياة فيها ناس ما بتعرف شو بدها …. انا احيانا بحس هيك

  5. femaleNo Gravatar قال:

    كويس أنك تجرأتي :mrgreen:
    بس ممكن نعرف ايش هي الخطة a

  6. QabbaniNo Gravatar قال:

    اااخ على ايامها

    كانت البكلويا بعمان , الفكرة انه امحتان الأحياء ساعتين و نص , المهم خلصت ب ساعة و 45 ديئية و اعدت اتحركش بالشباب

    و ألب الدنيا ما لقيت غير واحد جاي من برا بخطوات سريعة على القاعة و ماسك اوراق لعندي وقف جنبي و حط ايديو على كتفي وقلي مسكتك.. طبعا للحظة انا إفلجت إلا شوي و نقزت كلي … ولا بإلي انته يلي مريت من جنب القاعة الصبح كنت تضحك على الشباب مو عيب عليك …

    بدي التو تضرب سبو . بس ما إدرت بضل مدير قاعة و إلو قيمة على اساس

  7. AGdedouyNo Gravatar قال:

    ذكرتيني بأيام البكلوريا

  8. سلامNo Gravatar قال:

    حلوة هالذكريات، يعني يمكن كان صار بدها علبة محارم لبين ما كنتي رديتي عليها.

    عفكرة العامية ملائمة لهيك كتابات بتخلي الواحد يتخيل الحادثة أكتر، تحياتي فرح.

  9. ميّNo Gravatar قال:

    LOOOL!!
    مسكينة ;/

  10. MR.BlueNo Gravatar قال:

    هههههههه

    ذكرى حلوة… بس يا حرام عليكي شو ساويتي بالبنت P:

  11. صريحNo Gravatar قال:

    ههههههههه

    عاد تعرفي تعودت منك الاسلوب الجاد في تدويناتك

    بس هذي التدوينه غير شكل ، ضحكت من قلبي

    خصوصاً النهاية الغير متوقعه

    اشوى انها محتاجه محرمه
    انا واحد كسر ظهري ماعنده اي خطط سوى ” كثرة الدق تفك اللحام ”

    هات يادق في ظهري واخوكي طناشي ورانا اسئلة اطول من الوقت المحدد
    وعلمتني الحياة انه لافائدة من الروشتينات D:

  12. fatoshaNo Gravatar قال:

    ياحرامو .. عنجد زعلتيني عليها

    ذكرتني بذكرى امتحانية مأساوية ما بتروح من بالي

    هاد بزمناتو كنت بالحادي عشر (أيه من أكتر من خمس سنين .. من زمان يعني) المهم كان عنا مذاكرة معلوماتية نظري … ومحسوبتك كانت شاطرة كتير بالمعلوماتية .. علامتها دايماً كاملة فيها ولا مرة نقصها شي ..

    المهم كنت قاعدة وعم بكتب بأمان والله.. فجأة بتقوم البنت يلي بالمقعد يلي جنب مقعدي من مكانها بدها تسلم .. وأنا كنت عم بكتب لسى .. فن حلاوة الروح رفعت راسي لما فزت بجعزة .. ما لحقت لسى . ما بلاقي غير الآنسة مسكت الورقة قال هاتي سلمي ورقتك .. لك ليش شو فيه والله ما عملت شي!

    قال ليش طلعتي بورقة البنت .. لك والله ما طلعت بس وحدة فزت بجعزة وأنا نقزت طلعت عليها .. ما قصدي ..
    قال عم تجأريني .. ما لقيتها غير مسكت ورقتي وشقتها!!!

    أنا هون قعدت على جنب وبلشت أبكي .. أنو والله أقسم بالله أقسم بالله أنو ما تنقلت شي .. أصلاً ما كنت بحاجة ..

    بعد هيك دخلوا عليها رفقاتي رضيت تعدلي المذاكرة مع غير شعبة بعد ما اعتذرتلها

    رغم أنو هي يلي لازم تعتذرلي ..

  13. FaRaHNo Gravatar قال:

    عوني …

    ان شاء الله سأدون بالفصحى دوماً في المرات القادمة …. ولكني احب التغيير و اضافة نكهة جديدة … وجودك الجميل . شكراً ..

    ღ ღ

    مجرد أماني …

    ما قلته اسعدني حتى السماء .. شكراً لك عزيزتي ..

    ღ ღ

    أحمد …

    أتلقى الذم كثيراً على هذه الصفة .. ولكنني ما زلت متمسكة بها … شكراً لوجودك

    ღ ღ

    محمد max13 ….

    يا هلا والله …. بتعرف يمكن قصدوا انو بيبين الشخص اللي عميتنقل من غيرو … واحساسك صحيح بوافقك عليه … شكراً لوجودك

    ღ ღ

    female…

    امممممم الخطة a يمكن انو ما اجي عالامتحان هههههه او الدراسة عالأغلب ..
    نورتي المدونة …

    ღ ღ

    قباني …

    يا لطيف على مديرين القاعات … بتزكر مديرة القاعة عنا انكسر كعبا وهي عمتتفتل .. بعد شوي هتجيب الاسعاف مشانو … يعني قلبت المدرسة فوقاني تحتاني …
    ههههه صحي ليه كنت عمتضحك مو عيب عليك :p

    ღ ღ

    AGdedouy

    منيح اللي هي ذكرى منيحة عندك … شكراً لتعليقك

    ღ ღ

    سلام …

    كان في انسة عنا تبكي الطالبات وتقلن لشو الله خلق الكمام ههههه فانا ما دخلني بدها علية او محرمة … اهلا وسهلا سلام

    ღ ღ

    مي …

    مين المسكينة انا ولا هي هههه
    شكراً كتير لوجودك .. نورتي

    ღ ღ

    MR.Blue

    نورت المدونة … اممممم حرام علي … يعني وهي مو حرام عليها .. يلا منيح اللي هيك ما صار أكتر

    ღ ღ

    صريح …

    والله صعبة وقت بيكون الوقت محدود .. مافي وقت الواحد يحك راسوو ..
    بس خليك طناش احسن ما الدكتور يطنش العلامات …
    الله يوفقك يا رب … شكراً لوجودك

    ღ ღ

    فتوووش .. فتووووشة .. فتاتشيتووو … لك اهلين وسهليييين

    والله ما كان معها حق … بتلاقي احيانا آنسات المعلوماتية بيتزاولوا من الطالبة الشاطرة بالمعلوماتية وبتفهم احياناً اكتر منن …

    يلا معلش المهم انو خلتك تعيدي المذاكرة ..

    والله هالآنسات بيطلعلنا كتير اعتذارات معن … بس شو بدنا نعمل أمرنا لله …

    ღ ღ

    شكراً لوجودكم جميعاً …..

  14. حائرهNo Gravatar قال:

    ذكرى جميلة …

    وأسلوب مشوق،،،

    دمتِ بذكريات جميلة ..

  15. FaRaHNo Gravatar قال:

    اهلاً بالحائرة

    أسعدني وجودك ..

    شكراً لك

  16. ناسداكNo Gravatar قال:

    عنجد احلى ايام كانت البكالوريا وهلء منتحسر عليها

  17. FaRaHNo Gravatar قال:

    صحيح ..

    كل الذكريات منتحسر عليها

    واحيانا لما منكون عايشنا ما منصدق ايمتى تخلص

    أهلاً ناسداك .. اسعدني وجودك اتمنى استمراره …

  18. عسى دوم اوقاتك حلوة وطريفه

إكتب تعليقك